الغطرسة الرجالية.
خاطروا راجل لازموا يتكلم بصوت عالي و تسمعوا، لازموا ياكل و يخلي و ينحي و يرمي، و تلاحضلوا يهزك و يحطك و جرب قلوا هو يعمل حاجة تتسمى مسيتوا في رجوليتوا . و لازمك تسكت و متكلموش خوك بوك راجلك ايه راجل و انت تسكت و تنجم توصل الحكاية للقدر و ميجش تقلوا هز و مد و اعطيني و عاوني.
خلي عاد النوع الي لا يخدم لا يتعب لا يشقى و يولي راجل كان مع أموا، أختو ، صاحبتو او مرتوا. عايق لا يبلل لا يعل لا ينفع روحوا لا عايلتوا لا بلادوا. و يخسر عليك كان شخلالي لوالد و شعطاتني بلادي. و ديما لاعب دور الضحية.
هو راجل و عندوا الحق في كل شي اي نعم كل شي يدخل يخرج يكلم الي يحب و وقت الي يحب. خلي عاد مع صاحبتو و الا خطيبتوا و الا الي هي يولي يمجد و يهز و يجيب و هي عندها حق و نص تكون معاه و ين مايكون . للا البية و يواتاها الدلال.هو بيدوا لهنا يولي سيدي الحزار في الدار، اختوا لا عندها الحق لا تتعرف لا تصوحب لا تحكي لا تصور لا تهبط لا تلبس و لازم يجي ولد الحلال و يلقاها و يعرس. مجاش هاك قاعدة و لا تخرج لا صحاب لا تقرى لا تخدم لا تعرف عباد جدد لا تخالط لا تتحمل مسؤوليات لا شي. و هذه تربي جيل تعلموا نفس الحاجات و غدوة كي سي السيد يمد يديه و يعنفها لازم تسكت مدافعش متشكيش و متحكيش خاطروا راجل سي السيد. وكان لازم ترضيه زادا. هذه تربية خوف هذه تربية تطييح قدر موش قدر. مسكينة كل مرأة تعيش في الإطار هذا مساكن البنيات الي تعلموا كان يسكتوا و تعلمت مفاهيم غالطة في وسط ماعندها فيه حتى حق. وين تتجرد من المبادئ الأساسية وين عمرها ما سمعت الي المرأة عندها حق و تتكلم عليه. وين تتحرم من قرايتها و رايها و حريتها و حياتها....
تونس 2022 مزالت تعاني المرأة في وسط مجتمع رجالي لا إنساني.
