حالة عاديّة

« L’état de nature l’homme est un loup pour l’homme, l’état social l’homme est un dieu pour l’homme »

هذي فرضية انطلق منها الفلاسفة و المفكرين باش يفسرو كيفاش وصلنا تنظمنا بالشكل هذا و كيفاش عملنا نواميس العيش المشترك

اولا اش معناها الانسان في حالة الطبيعة أو حالة التوحّش؟ 

معناها الإنسان في الحلقة الاولى مالسيزون الاولى متاع سيري الانسانية .

مونتسكيو مثلا (السيد اذاكا متاع تفريق السلط الثلاث) قالك اول ما تحل ناتفليكس او ايجي باست كل قدير و قدرو و تبدا تتفرج باش تلاحظ حاجتين مهمين في تصرف الانسان اولا الضعف ثانيا الخجل.

 الانسان وقتها خواف و حشام و كلها كي بعضها متساوون في الجبن مما ادى الي فرض اول قانون طبيعي الي هو السلم و فما مع الضعف رغبة فالبقاء لذلك فإنو من الطبيعي يكون ثاني قانون طبيعي هو البحث عالغذاء لأنو باش يحافظ على البقاء متاعو في هاك البيئة القاسية لازمو يرم عضمو و اذا شبعت الكرش يدورها تعارف و هذا بديهي نظرا للانجذاب الي يحصل بين الجنسين و هذا القانون الطبيعي الثالث و بعد تولي تحركنا الرغبة باش نعيشو في مجتمع و هذا القانون الرابع و اذا تنظمنا في  مجتمع وقتها تدخل اوموراخرى أكثر تعقيدا، والتنظم في مجتمعات ساهمت فيه اللغة بشكل كبير لكن اللغة موش حاجة خاصّة بالانسان خاطر النحل و النمل و حتى القرود عندهم قدرة على نقل المعلومات لبعضهم ولكن ما يميز لغة الإنسان أنها تتجاوز الوصف العادي لما هو موجود وسطحي إلى ما هو أعقد عنا قدرة على "التقلقيل" ونقل عدد كبير من المعلومات على بعضنا وهذا ساهم في تجميع الناس و بعد الأمور اتطورت أكثر وولات تجمعنا حاجات مشتركة خلاتنا نتنظمو في مجموعات تربطها الأرض أو الدين أو العرق أو الإديولوجيا  .

اما فتكم بالحديث مونتسكيو وقت الي يحكي في السينوبسيس متاع الحلقة الاولى ما نساش باش يكلاشي هوبس و يقولو راك غالط الحلقة الاولى تعدات رايضة لا فيها حروب لا عرك، بالنسبة ليه الحروب مبعد باش تجي كي يولي الانسان والإنسان  ماعادش متساوين فالضعف و الجهل .

 و هوني خسارة ما خلطش هوبس على مونتسكيو و الا رانا شفنا beef فقهي مالبريمة  لكن الله غالب ربي يعطي ال Diss للي ما عندوش زروص .

وعلى ذكر هوبس، هو  كان عندو تصور مختلف تماما لحالة الطبيعة و التصور هذا على خاطرو يعتبرنا  ملة ساقطة و قال علينا ذيوبة و اشرار بطبيعتنا و قالك في حالة الطبيعة سيناريو الحلقة الأولى هو أنو الانسان بما انو شرير و الي دايرين بيه اشرار و الكلهم عندهم نفس الهدف الي هو كيما قلنا قبيلة ضمان البقاء و الموارد شحيحة معناها الي باش يخرج من قرطاسو ياكلولو راسو و ما فماش امان و بطول المدة سيستحيل العيش بيناتهم خاطر الي يخرج يعرض حياتو للخطر خاطر يقتلوه و الي يقعد متخبي زادا في خطر خاطر باش يموت بالجوع. عاد فما واحد باش يقول توة شنوة توة العيشة الضنكة لازم نتلمو و نلقاو حل فتم تمرير المقترح من كهف لكهف وشجرة لشجرة و تقابلو نهار الاثنين العشرة تحت شجرة الزنباع صعيب شوية تكون تفاح خاطر وقتها التفاح ماطورش من روحو وكان غلة موش بنينة ما يغركمش توة برشن و فاح كان ڤارص مكلح حاصيلو تلمو و قالو بما أنو حد ماهو عاطي الامان للآخرين و الي يعطي بظهرو يتدغر و جو الاخوة الاعداء اذايا ماعندو وين يوصلنا باش نموتو الكل ايا شكون فينا  ياخويا يعمل الي يحب المهم يعطينا الامان الناس كلها وافقت قاتلك برا بركة المهم نعيشو ومانموتش وقتها الإنسان  قايض حرياتو الكل بمقابل الامان والحق في البقاء حاصيلو نهارتها فما واحد قام مخر خلط عليهم للاجتماع قالو برا هو الي يحكم و حد ماكان مالعاكسين.  

لكن الحاكم هذا كان عندو سلطة مطلقة وقت إلي خرجنا من فوضى حالة الطبيعة وتنظمنا في نواة أولى للدولة موش في صورتها الحديثة لدرجة أنو  صار  مستبد وظالم وقايضهم بوجودهم وحياتهم وقفتهم واذاكا علاش "الحاكم" عندو نزعة استبدادية استمرت معاه إلى اليوم.

 Place هو مشروع تعاوني وتجربة اجتماعية عملها Reddit  موقع تواصل اجتماعي نهار كذبة أفريل 2017 .

التجربة هذي عملو فيها لوحة canvas على الإنترنت موجودة في موقع فرعي r / place ، كل مستخدم مسجل ينجم يدخل يبدل لون بكسل Pixel واحد برك وعندو 16 لون يختار منهم وبعدها يتبلوكا لفترة بين 5 و20 دقيقة معناها لازمك تبدل بكسل واحد برك وتستنى شوية باش تعاود تبدل حاجة اخرى.

اللوحة عملاقة  فيها مليون بكسل، التجربة دامت لساعات مالأول بداو يظهرو التقسيمات إلي خلقوها المستخدمين في اللوحة  مثلا "الركن الأزرق" إلى فيه ناس تحاول ترد اللوحة الكل زرقاء و من جهة اخرى فما جماعة يحاولو يحطو تصويرة بوكيمون وبعد الاومور اتطورت وولاو فما مجموعات متطورة اكثر يمثلو فرق رياضية أو دول ويحاول ينسقو مبعضهم باش "يحتلو" اجزاء من اللوحة ويسيطرو عليها ويزينوها بما يرمز للكوميطة متاعهم.

وبشوية بالشوية زادو التقسيمات تعقيدا وظهرو مجموعات فنية تحاول ترسم لوحة الموناليزا والا لوحة فان غوغ ومجموعات تحاول ترسم أعلام دول أو علم LGBT . وغيرهم من التقسيمات المعقدة ظهرت في بضع ساعات وفي ظرف 72 ساعة اكثر من مليون مستخدم قامو بتغيير 16 مليون مربع وقريب 90 ألف مستخدم ناشطين ويغيرو في الوال البكسلات على الموقع.

وبعد تلاثة أيام تم إنهاء التجربة من قبل مسؤولين في موقع Reddit.

 التجربة مهمة خاطر تبيّن ثقافة الإنترنت ككل، بل اكثر من هكا تبيّن نزعة الإنسان نحو التنازع والصراع وإلي يرجعنا مرة أخرى لكلام هوبس إلي يعتبرنا في حالة "حرب الكل ضد الكل" خاطر التقسيمات إلي ظهرت في فضاء تافه كيما إلي خلقتو التجربة يخلينا نخممو علاش الإنسان ديما يمشي للتقسيم والتشتت هل لإننا مختلفين أم لأن الصراع حاجة مترسخة في جينات السابيانس إلي دفع بالأنواع الأخرى نحو الإنقراض و قعد هو سيّد العالم.

الإنسان إلي وصل بيه الأمر انو يبيد نوعه بالإبادة والحرب وهذي حاجة ماعملها حتى كائن آخر على هذا الكوكب لأن مافما حتى كائن غبي لدرجة انو يبيد بني جنسه ويهدد وجوده وتوصل بيه إلى الدفع بالكائنات الإخرى إلى الإنقراض ودمر الكوكب بالتلوث واستنزاف الموارد الطبيعية . الإنسان إلي صراعاتو الهووية قاعدة تزيد و حروبه القادمة باش تكون حروب على المياه وضد الفيروسات

هذايا الإنسان إلي جون جاك روسو متاع نظرية العقد الاجتماعي قال عليه طيب بطبعه و الطيبة هذي خلاتو ضعيف لا يخبش لا يدبش لذلك عمل عقد اجتماعي باش نجمو نعيشو اسرة مع بعضينا في سلام.

كي تقوللنا حالة الطبيعة ما كانتش حرب  فسرلنا علاه احنا لتوة نسعاو للتسلح ؟

 و الا علاش عاملين بيبان يتقفلو بالمفتاح ؟ يتسائل توماس هوبس. (التنين)