الكلنا تنجم تكثر علينا الخدم ولا الحاجات اللي لازمنا نعملوهم و نجمو ندخلو بعضنا و منجموش نكملوهم على اكمل وجه و فينا شكون جيست يحبس و ميخدمهمش ،، الحل تع المشكلة هاذي هوا انك تنضم وقتك و تعمل خطة عمل واضحة على المدة اللي عندك و لازمك تكمل فاها خدمتك ، بالطبيعة لحكاية صعيبة مش بالبساطة اللي تبان باها لكن عالأقل المشكلة عنها حلول عملية و واضحة ، على عكس التسويف و الكسل المستمر اللي برشا توانسة و بشر فالعالم الكل يعانيو منو و الإجابة تع العنوان مش واضحة كيف الإجابة السابقة .
شنوا تسويف
التسويف هو انك تأجل الأعمال الصعبة او الي تاخذ وقت كبير لوقت آخر ممكن ميجيش و تخدم حاجات اقل اهمية او/و تلعب ولا تضيع الوقت الى ان يداهمك الوقت من جديد ، و تواصل الحالة هاذي تنجم تأدي الى تداعيات نفسي كبيرة ، كيف مرض الكآبة .
فالمقال هذا باش نحاول نحكيلكم كيفاش نتعارك مع نفسيتي باش نتجاوز التسويف نقضي على الكسل و نخدم خدمتي ، كانت عندي برشا مشاكل تع انضباط فالدراسة و كان معضمها بسبب مشاكل نفسية تجاهلتها الى ان وصلت للتسويف و الكسل المتواصل ، باش نحكيلكم اهم ثلاثة ستراتيجيات استعملتهم باش تجاوزت المرحلة الصعبة اذيكا ولي مزلت لتو نطبق فيهم باش نبقى فعال و ناشط
.
غدوة خير
جا نهار بعد مدة طويلة من الكسل و قررت فيه اني نتحسن و اول حاجة عملتها اني شديت كراسة و كتبت كل شي نعملو في نهاري بالباهي و بالخايب اللي فيه ، و كنت كل ليلة قبل منرقد نقول غدوة باش نخدم و مش باش نبخل ، و كل نهار نفيق فيه نقرى شنوا عملت البارح و نحاول نحسن في الحاجات اللي نعملهم باش نجم نكتب حاجة ما خير
كانت كاني نحكي مع نفسي تع البارح و برسمي حاجة اتعب انك تقرى كيفاه تضيع في برشا وقت كنت تنجم تستغلو في برشا حاجات مفيدة , و هاذي الحاجة اللي شجعتني باش نحي فيسبوك و اليوتيوب و الكلاش رويال ..
اما لحكاية هاذي شدت اكثر من جمعتين و بدات بتنقيص ،، اما على كل نهار يتعدى فيه تحكتب عادة سيءة كنت تبجلها على انك تخدم حاجاتك المهمة ولا تحضر ، يزيدك ندم على ندم و يزيد يضغط عليك اكثر باش تتبدل و مفامش شكون باش يحرص عليك ڨدك انت .
كول جرانة اول ما تفيق الصباح
مارك تواين قال "كول جرانة حية اول ما تفيق صباح ، و من المستحيل حاجة ما أخيب تنجم تصيرلك" يعني انك كي تعمل حاجة تراها صعيبة و خايبة ياسر اول حاجة الصباح ،، مفما حتى شي يفسدلك نهارك و باش تعدي نهار فعال و خدام . و الضفدع تاعي هوا كان اني نفيق الصباح بكري عاللخر و نترانا وللي هيا حاجة شبه مستحيلة كانت بالنسبة ليا اما اذا عملتها كان يتعدالي نهار و انا ناشط و مرتاح خاطر نبدى نهاري و انا عارف اني كملت اصعب حاجة فيه و من الستحيل حاجة تحسسني انو نهاري ضاع والي منجمش نعمل حاجة .
تنجم تكون الحاجة هاذي ساهلة عندك ، كيف متبانلك صعيبة ، اذاكا علاش قتلك حاجة صعيبة بالنسبة ليا . انت اختار حاجة صعيبة عليك انت و باش تلاحظ انك ماعادش مركز مع الجوانب السيءة من الاشياء اللي يصيرولك و برشا حاجات كانت صعية عليك باش تراهم ساهلين مادامك ديجا عملت اصعب حاجة بنجاح .
ادنى مجهود - اقصى مجهود
البرانسيب هاذا نرى فيه اكثر واحد عاوني في الثلاثة هاذم ، خاطر حل مشكلت كي تجيك بيريود فاد و مزاجك متعكر و معينك تعمل شي و هاذي تخص الجماعة اللي عندهم اضطراب ثناءي القطب و الا اي انسان يفد لمدة طويلة .
البرانسيب ساهل ، يقلك اذا عندك خدمة باش تخدمها على مدة معينة اما مكثر وقت باخل على خاطرك فاد و معينكش اما يجو ايام قليلقة تشره فيهم و تكون مركز ممكن اانو مزاجك لاباس و مرتاح ،، لازمك تحط رقم يمثل اقل مجهود تخدمو فالايامات اللي تكون فاد فيهم و معينيكش و رقم لأقصى مجهود تستغلو في اياماتك اللي انت فيهم لاباس و جوك احلى جو . اما لازم الأدنى متطيحش عليه مهما صار !
مثلا انا نخدم مطور ويب ، كي كانت عندي الحالة هاذي كنت نقرى و نخدم على بروفيلي باش نقويه ،،، النهار اللي نكون معينيش باشش نخدم ، و منجمش نركز حاط حد ادنى من الخدمة ساعة ، ميهمش انا شبيني لازم فما ساعة خدمة و في الماكس تاعي نشد نهار كامل . لاحضت انو المدة مابين الايام اللي نفيق فيهم ناشط بدات تصغار بشوي بشوي لين وليت نخدم كل نهار و جوي باهي .
انتا زادة تنجم
اذا وصلت كملت الارتيكل معناتها راك برسمي حسيت باللى نحكي فيه و تحب تتطور اذاكا علاه نحب نقلك برافو اول خطوة كملتها انتا صايي انك قررت ، و تبقى انك تجرب الافكار هاذي و انا متأكد انها باش تعاونك حتى كان شوي برك و انتا تكمل .
